Ang Mahabang Hatinggabi (Na Kung Tawagin ay Buhay)
Oh Paraiso
Subukan man kitang hawakan
Ay makakalmot lang ng aking daliri ang usok na anak ng isip
Sinubukin ko itong langhapin at nabulag ako sa pangarap na 'di ko inakalang akin
MANONOOD
Dumilat ka't lahat ay mawawala
Pumikit ka't wala kang makikita
Oh Paraiso
Pakiramdaman mo ang yakap kong kukulay sa iyong balat
Sa pagpisil ng aking braso ay ilabas mo ang tunay mong ilusyon:
Sugatan mo ako; ako ay magdurugo
Sugatan mo ako at AKO AY MAGDURUGO!
Ipikit mo ang aking mata upang ako ay magising palabas ng iyong telebisyon
Pigain mo ang dugong nalalabi sa aking puso
Halikan mo ang aking noo
At ipatak ang iyong luha sa aking labi
OO! Nalalaman ko!
Nalalaman ko ang totoo!
Nalalaman ko!
Nalalaman ko na:
Sadyang mahaba ang hatinggabi
At ang paghihintay ay walang ibibigay kundi antok
Habang ang pisngi ay umaasa sa pangako
Na sisikat rin ang araw
Upang ibigay at ipaalam
Ang mgay bagay na 'di ko nalalaman
Ang mga bagay na 'di natin nalalaman
Oh Araw
Ibigay mo, Ipaalam mo
Ang mga bagay na 'di ko nalalaman
Upang aking kalimutan.
grasseseatcows
3/09/2006 09:17:00 PM
Ang Hinagpis ni Tao
Regalo mo'y di na kailangang alugin
Saya ang maramdaman nang matanggap
Salamat.
Ngunit ano ba ang Iyong inakala?
Na ako ay tulad Mo?
Ang dibdib ko ay gawa sa laman!
'Di tulad ng pader;
Matitibag sa martilyong kamao
Masusugat sa hiwa ng patalim
Magulang na nawalay sa anak
Lumuhod ka at umiyak
'Di ako maaawa
Pero ako ay humihingi ng paumanhin
Paumanhin at hindi ko maibigay ang Iyong hinihingi
Ngunit hindi ko sinasadya
Tandaan mo:
Hindi ko ito sinasadya.
grasseseatcows
3/09/2006 04:11:00 PM